АьрхIал зузала дакIнийн утлай
Ноябрь зурул дайдихьулий ца шин хьунни жул ххаллилсса зузала Сулейман Чугуев ахиратравун лавгун. Сулейман ия хъинну иминсса, дакIнил хъинсса, гьарцаннащал хIал бавкьусса инсан. Районналул культуралул къатлуву зий лавгссия мунал щала оьрму. МяйцIалку шиннардий Сулейманнул бюхттулсса чIуних вичIи дишин гъирарайсса тамашачитурал бувцIуну бикIайссия клубрал зал.
Тай шиннардий гьарцагу концертру, ЦIуссалакрал культуралул коллективрал дихьлахьисса, районналул кьатIув дикIу, жула районналул щархъаву дикIу, Сулейманнул дачин дурнуя дикIайсса. Цала бюхттулсса чIунихлу ванайн ЦIуссалакрал Левитан тIисса ялун цIа дирзун дикIайва.
Мадарасса захIмат бивхьуссар Сулейманнул культуралул къатлул зузалтращал зунттал щархъаву, къутаннай, мащай концертру дихьлай занай дякъивухгу, кIиришивривухгу.
Мукун концертру дишин лавгний хьусса иширттал эпизодругу буслан ххирассия. Сулейман ия хъинну пасихIсса мазрал ва магьирсса мукъул заллу. Ванал чичайссия назмурдугу.
Сулейманнул мукъурдийсса балайрду тIий бивкIссар чIявусса лакрал балайчитал. Талантру чIяруссия. Сулейманнул чивчусса «Бяйкьусса алши» тIисса пьеса бивхьуссар ЦIуссалакрал МухIуттин Чариновлул цIанийсса театрданул артистурал.
Сулейманнул бувккуну бия Дагъусттаннал шяраваллил хозяйствалул институт. Жу бикIайссияв мунахь ина аьйкьуну агьну ура мивун уххавриву, вин аьркина магьирлугъралмур институт буккин тIий.
Му мудан луттирду ккалай икIайва. Чани чан хьуну, цанма ккалан захIмат хьусса чIумал, Сулейманнул телефонналуву цанма ччисса луттирах вичIи дишин бюхъайсса программагу дирхьуну, вичIи дихьлай икIайссия. Фотоаппаратрах суратругу рищайссия. МуначIа ххуй-ххуйсса суратирттал коллекция бикIайссия. Жу бикIайссияв мунахь, ачу, Сулейман, вила фото – суратиртал выставка сакин дува МахIачкалалив тIий.
Щархъавусса културалул къатрал зузалтрангу методист хIисаврайн хъунмасса кумаг буллай ивкIссар ва.
ЦIуссалакрал райондалий культура гьаз даврил ца шачIанттуйсса кIану Чугуев Сулейманнул бугьлагьиссар учирчан, цучIав бястлий му мукун бакъар тIий, уккансса ххай бакъара.
Зий уссия Сулейман районналлул кказитрал корреспондентнугу. Хъинсса корреспондент хIисаврай, Сулейман кIулссар цинявппагу кказит буккултран.
Хъинну захIматсса, жаваблувсса макьаларду чичин аьркиннин, Сулейман гьан уллай ивкIссар, мунал давричIансса къулагъасгу, гъирагу чIалай.
Хъунмасса кумаг байссия Сулейманнул жагьилсса корреапондентътурангу. Цинявппагу редакциялул зузалт, Сулейманнуйн къавщуну щаллу къашайссия. Ва ия даврил сант кIулсса, цIувххумунин дулунсса жавабгу хIадурнасса инсан.
Ххирая Сулейманнун назмурду ккалангу, жула коллектив ци дунугу байрам барча дуллай щябивкIсса чIумал, жу мунахун бахчайссияв, ци – дунугу назму дукки тIий. Ца назму дия мунан цанна ляличIийну ххирасса – Андрей Дементьевлул чивчусса « Никогда ни о чем не жалейте». (Яларай дуккин бюхъайссар) Жугу мунахь му дукки тIий бахчайссияв.
Махъ ппурттуву жул кказитрай зий буссия Сулейманнул душ Оксана. Вагу бур цила ппу кунма талантру гьарзасса инсан.
Сулейманнул цамур душ бур Германнаву ялапар хъанай. Му бур художник.
Цамургу душ бур МахIачкъалалив ялапар хъанай, цилла чIирисса предприятиягу тIиртIуну.
Сулейманнул цIуцIаву анавар дурккуна кулпат бивкIуну махъ. Пикрирдай икIайхьунссия…
Кулпатгу мунан бакIрайн багьссия культуралул къатлул сценалий. Мий бикIайссия аьрхIал зий.
Миннал эшкьи – ччаврил хаваргу ляличIийсса асар хьунсса буссар…
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
