Решаем вместе
Не убран мусор, яма на дороге, не горит фонарь? Столкнулись с проблемой — сообщите о ней!
Меню
12+

Сетевое издание "Редакция "Голос времени"

27.04.2021 14:22 Вторник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Ххуйминнавугу ххуйсса инсанъя ва

Автор: Зульмира Юсупова
Источник: Редакция районной газеты "Голос времени"

Инсаннал цалла цIа абад дувай, цукунсса иширавун агьарчангу, къириятрал ххуттава къаувккун, оьрму бутан хьуншиврул. Чапаевкаллал шяравасса Зантуев МухIуттингу гьарца га кIулнан дакIниву ливчIун ур ххуйминнавугу ххуйсса инсаншиврий. Га чIумалсса халкь бия инсаншиву ядан кIулсса, яхI – намус буруччаву цалчинсса цайва бивхьусса буржну чIалачIисса. Мукунминнаясса ца ивкIун ур МухIуттингу. Зантул МухIуттин увну ур Ккуллал районналийсса ЧIарттал шяраву.

Зунттаву хъуна хьусса оьрчI, ва ивкIун ур чару куна кьянкьасса, чурххай битав-цIакь бусса адамина, зунттал щаращал щин куна марцIсса, зунттал гьава куна гьартасса дакIгу дусса. Дуккин ччай уна, ларайсса кIулшиву ласун къахьурчангу, каши диял къахъанай, МухIуттиннуща бювхъуну бур личIи-личIисса каялувшиврийсса давурттай зий, лажин кIялану оьрму бутан.

Аьралий буржгу биттур бувну, цIусса миналин увкIукун, МухIуттин айивхьуну ур ДОСААФ рал хъунаману зун. ЦIуссалакрал район ччаннай дацIан дуллай, хъунмасса захIмат бивхьусса адамина хъанай ур МухIуттин. Почтрал хъунаману зузисса чIумал, ЦIуссалакрал районналул почтрал связь диркIун дур Дагъустаннай кIилчинмур кIану бугьлай. ЦачIава зузисса зузалтращал хIал бавкьусса, учайсса махъ мяърипатрай учайсса, устарну гъалгъа бан кIулсса МухIуттин, ца уссуну ккаллий айсса ивкIун ур циняв зузалтрал.

Цала буттая буслай бур мунал душ Маликат: — Ттул буттал бувккуну бия связьрал техникум. Ганал ляличIину ххуйсса хатIгу бикIайва, цуппа ца гъалатI ита къабавкьуну дувайссия чичругу. ЛяличIийну итххявхсса икIайва хIисаврттал чулуха, хъинну ххирая история. Буттан ххирая луттирду, кказит – журналу ккалан, бувккумургу дакIни личIайва оьрмулухун.

Тамансса шинну дурну дур МухIуттинннул Орджоникидзел цIанийсса колхозрал ревизорну зий. Чув зий ухьурчангу, МухIуттин ивкIун ур тIайлашиву ччисса, чIанухун агьну даву дан ччисса, цаятура ва цайминнаяту тIалавшин ларайсса зузала. Ванан къаччива щялмахъ, аьркин бакъасса махъ кьацIлива буккаву, щил бухьурчангу. Къаччива питна, къалмакъал. Агар бивкIхьурча шяраву цаннайн ца къаччан бивкIсса, дакI дургьусса инсантал, мунал хIарачат байсса бивкIун бур миннал дянив маслихIат буван. Цащава бан шайсса кумаг, хIурмат гьарцаннан бан ччисса ивкIун ур .

Зантуевхъал кулпат бивкIун бур Чапаевкаллал шяраву хIурмат лавайсса, цалла тIул тIабиаьтрал цIаний цинявннан бусрав хьусса кулпат.

МухIуттиннул чIарав бивкIун бур, цува куна аькьлулул чантI увкусса кулпат, РайхIанат. Цуппа медсестра бунугу, ганичIа ца медициналия бакъассагу, гьарцагу элмурдаясса кIулшиву дия. Лагма хъанахъимуниягу чIявусса хаварду кIула. Ганин кIула инсан цихва вичIи дишин увну, хIайран увну, хавар бусан. Бусаймургу укунмасса ласу – къасу къабикIайвача, оьрмулиясса, лавгмуниясса, бучIантIимуниясса, динналиясса бикIайва.

Дин-чак ккаллий дакъасса, СССР хIукуматрай яхъанай ивкIнугу, бутта мудангу Исламрал хIуччардайн чул бивщуну икIайва, тIий буслай бия мунал душ. ОьрчIахьгу учайва, дин инсаннал дакIниву, бизлазисса шаттираву дикIан аьркинссар куну. Мудан оьрчIахь тикрал буллайна икIайва «Зунма къаччимур, чингу мабаванни».

Ларайсса диркIун дур МухIуттиннул ва РайхIанатул оьрчIаясса тIалавшинна, гайннал дуккаврия, тарбиялуя, мяърипатрая. Хъинну лавайсса бивкIун бур ва кулпатраву учительнал чулухунмайсса кьимат. Ца щилтагъсса махъ учительнайн куну, кьамул къабайссия жул буттал,- тIий, буслай бия Маликат. Дарсирая ххюва лавсун бувкIукун, зун му къабагьавай, лахъ бувнур бивхьусса тIий, цIунил бусласи байсса бувкIун бур дарс. Лакку кIанттах мякьнува, цала буттал шяраваллил хъусрал ЧIарттал ххуйшиврия, кIийсса инсантурал гьунардая буслайна икIайсса ивкIун ур. Битавсса, гуж бусса инсан ивкIун ур ва. Щяраваллил дазуйсса Арбулан зунттуйн лавхъун ивкIун ур жагьилний. МухIуттиннул цалва оьрчIахь учайсса бивкIун бур укунсса махъру: «На зун чIярусса хъус къакьариртссар, амма цаягу инсан кьадарсса адаминал оьрчIрур вай чинсса акъассар»- куну.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

14