КIива миллатрал дянивсса шеърирду

Гьарцагу инсаннал цанма пикри бучIан аьркинни ниттил маз я бансса, муний гъалгъа тIунсса ва цала оьрчIан лахьхьин бансса. ЧIявур жула райондалий цалва ниттил мазрайнияр ххуйну чийл мазрай гъалгъа тIутIимийгу. Чийл мазру ишла шаврин сававгу хъанай дур жула интернациональныйсса район.

ХIакьину жул ихтилат бур ишлану лакку маз кIулсса, яруссаннал миллатраясса хъамитайпа Нуцалай Султановая. Махъсса шиннардий Нуцалайл цIа соцсетирдаву ччя-ччяни кIицI лагай. Ванил цIа машгьур шаврил сававгу — яру мазрай ва лакку мазрай чивчусса назмурду дур. Куннил кув хъирив Нуцалайл назмурдал луттирду бувккунни лакку мазрай ва яру мазрай. Мунил шеърирду инсантуран ххира хьуну бур. Мий бивщуну бур яруссаннал кказитрай ва лакрал кказитирттай. Ччя-ччяни буккайссар жула районналул кказитрайгу. Нуцалайл пасихIсса шеърирду инсантуран ххира хьуну бур, ми буккин бигьасса, дакIнил ласайсса буну тIий.

Цуппа Нуцалай бувну бур Гумбетуллал районналийсса Килятли тIисса шяраву, I976 – ку шинал дуниял сукку хьуну, хьусса зараллацIун бавхIуну, ва районналул халкь Дагъусттаннал республикалул правительствалул хIукмулийн бувну, бизан бувну бур ЦIуссалакрал районналийн. Районналий му ппурттуву Ц1уссачIурттащиял шяравусса Ждановлул цIанийсса винсовхозрай зунсса зузалт аьркинну бивкIун бур. Зунттавату шилун бивзсса яруссаннал агьали, бувххун совхозрай зун, лакращал архIал зий, занай, ялапар хъанай байбивхьуну бур. Миннавух бивкIун бур жагьилсса душ, Нуцалайгу.

Совхозрай зий буна, ва кIул хьуну бур миккува зузисса Султанов Заурбеглущал. Заурбеглул кулпат ялапар хъанай бия чIаравсса ЦIуссаккуллал шяраву. Жагьилсса душ ва оьрчI цачIун хьуна I980 –ку шинал. Заурбег ия кулпатраву хъунама оьрчI. Кулпатравусса мюрщими оьрчIахь нину дикIайва магьри буслай, саннарду ккалай. Нуцалайгу къулагъас дуллай бивкIун бур цинма ххуй бивзсса мазрах. Ца-кIива зурува лакку мазрай ишлану гъалгъа тIун лавхьхьуна.

Шеърирду чичлай ва байбивхьуну бур школалий дуклакисса чIумалва, кIийва, зунттаву ялапар хъанахъисса чIумал.

Щар хьуну мукьах тIурчан, оьрчIру мюрщину буну, къатлул ва ичIаллил кушулуха шеърирдайн яржа къабияйсса бивкIун бу. Яла чIун ларгукун, оьрчIру хъуни хьуну, давугу чан хьувкун ялагу чичлан бивкIун бур яру мазрай. «Цукуннив цал дакIнийн багьуна яру мазрай чивчусса назму, лакку мазрайн таржума дурну чичин,- тIий буслай бия Нуцалай, — гай ххуйну хъанай чIалан дикIайхту, байбивхьура лакку мазрайгу чичлан. Буккултран ттул назмурду ххуй дизлан диркIуна. Му тагьар х1исав шайхту, ттунмагу ляличIийсса гъира багьуна лакку мазрай чичлан. ЧIал къавхьуну ттул назмурду рирщуна «Заманалул чIу» кказитрай. БувкIуна «Илчи» кказитрая жучIангу гьан бува вила назмурду тIисса хавар. Муна мукун хIалли — хIаллих тIий ппив хьуна ттул назмурду, буккултран мий ххуй дирзуна,» — укун бувсуна жухь Нуцалай Султановал.

Ванил гьурттушиву дувай шяраваллил ва районналул мероприятиярдаву. ЧIявуну гьуртту шай школалий дуллалисса ниттил мазран хас дурсса проектирдаву.

ДукIусса шинал Нуцалайл шеърирдал жуж бувккунни яру мазрай «Очаг горянки» тIисса ва лакку мазрайсса «Ссутнил ч1ун» т1исса.

ЧIявуну Нуцалай гьуртту шай шяраваллил библиотекалул дуллалисса батIавурттаву. Мукунма ччя – ччяни гьуртту шай цала зунттаву Гумбетуллал районналий дуллалисса мероприятиярдаву. Ванин хъинну ххирар Дагъусттаннал зунттая, неххярдия, т1абиаьтрая чичин. Гьарцагу инсаннал буссар цала дакIнин ххирасса кIану: цува дунияллийн увксса, цалчинсса шару лавсъсса, школалийн лавгсса ва цува оьрмулуву машгьур хьусса. Нуцалайл мукунмину кIира район хъанай дур. Мунин бувну цила назмурдугу кIирагу районналия ва миккусса агьалийнал багьу – бизулиясса дур. «Цанакулсса жагьилтуран шагьрулул оьрму ххуй бизлай бур, ттуннив ххуй бизай жула зунттурду, гьалаксса зунттал нехру, лахъсса муруллив ва щюллисса ар – майданну. КIирагу район: Гумбетуллал ва ЦIуссалакрал ттун ххира хьуну дур. Мий кIирагу дуссар ттул дакIниву ва бакIраву мудан», — тIий бия Нуцалай. Ванил цила оьрму лавгун бур къюмай тIутIул совхозрай зий. ЦIанакул тIурча ва шаппа бигьа лаглай бур. ЦIана ваничIа назмурду чичлансса чIунгу дур. ОьрчIру хъуни хьуну цала-цала къатрай бур. ЦIана ванил аякьа оьрчIал оьрчIаха дур. Бур ванил чивчуну оьрчIан хас бувсса шеърирдугу. Ванил назмурдаву дур патриотизм, ххуймунин, хъинмунин кIункIу тIаву, лавгсса заманалул барачатшиву ва цанасса оьрмулиясса ххаришиву. Яла –яла жула хьичIунмур аваданшиву ва хъус – му жула ниттил мазри. Дуниял кIул дувайсса гьарцагу чIивитIул, ниттил мазрай гъалгъа тIийри. ЧIивиния шинмай, жува халкьуннал магьрах ва баснярдах вичIидихьлай аьрат хъанай буру. Мигу жухьва бусай чIявучин бавахъал. Маз миллатрал тарихри ва аваданшивур. Миву дуссар миллатрал аьдатругу, магъирлугъгу, багьу – бизугу. Мунияту ябан аьркинссар жула ниттил маз. Маз ябаву – му жула буржри ялун нанисса никирал хьичIсса.

Мунин бувну, Нуцалай Султановалгу кIивагу маз ябаврил цIаний, цила назмурду чичлай бур яру мазрай ва цинма ххира хьусса лакку мазрай. Нуцалай, жу ялугьлай буру вил цIусса назмурдах. ВицIун кабакьиннав!