Лакку маз тачIав бух къалагантIиссар

Диктант чичаврил сакиншиннарая ва миву гьуртту хьуминнаясса циламур пикри бувсуна Светлана Рамазановнал районналул кказитрал зузултрахь.

«Жула ниттил маз-му бур жува дунияллийн буккайхтува, жула лагма-ялтту жунма баллалисса маз. Гьарцагу миллатрал бур цала маз, цала-цала аьдатру ва магьирлугъшиву чIалачIи дурсса. Жуламур ниттил маз бур лакку маз. Жунма цинявннан му ххигу ххирассар, жула маз ябувансса хIарачатгу буван аьркинссар. Лакку маз ябуваврил ва му гьарцагу лакрал дянив хъиннува ашкара баврил пикри гьанулун лавсун, сакин дурну дия ва лакку мазрал диктант чичаврил давугу. Цаппарасса жагьилтал тIун бикIай: ци байссар жун лакку мазрал, му чув ишла буван аьркин шайсса мазри, тIий. Нитти-буттал ва ниттил мазрал дарс дихьайсса учительтурал буржри оьрчIан бувчIин баву, ссан аьркинссарив ниттил маз, циваннив му кIулну бикIан аьркинса. Цивппа хъуни хьувкун, оьрчIан му цанмагу бувчIинтIиссар, амма яла цIакьмур гьану школалий дуклакини бишайшиву кIулну бикIан аьркинни. Жува жулва маз лахъ-хьун буллай бухьурча, жула мазрал хIурмат ва кьимат лавайсса бишлай бухьурча, маз тачIав бухкъалагантIиссар. Мюрщину бунува, нитти-буттал цала оьрчIаву хIасул дан аьркинни ниттил мазрахсса, буттахъал аьдатирттахсса ччаву. Жула мур жура лахъ — хьун дуллан аьркинни: хьхьичIарасса жула лаххи – ликкиягу, ичIура ишла дайсса кьай-кьуйгу, буттахьал аьдатругу, жула зунттал билаятрахсса ччавугу. Жува цинявппагу пахрулий бикIан аьркинссару жула мазрая, жула зунттал билатрая, буттахъал аьдартирттая. Ниттил маз ххирашиву ва муний гъалгъа тIутIаву- мугу жула буттал кIану ххирашиврул ца лишанни. Ниттил мазраву буссар жула хьхьичIрасса никирал чIугу, буттахъал тарихрал бутIагу, гъанчувнал дянивсса дахIавугу. Ци дикIан бюхъайссар ниттил мазраяр гъансса ва ххирасса? Ниттил мазрая гъалгъа багьувкун, хьхьичIва-хьхьичI дакIнийн багьай жула тарих, буттахъал дирхьусса дарсру, хьхьичIарасса аьдатру. Мазрал дакъарив халкьуннал дянивсса дахIаву дуллалисса?

Жула дакI-тттиликIгу, рухIгу ниттил мазравурхха дусса. Миллатгу сагъну буссар , ниттил маз ябувссаксса. Жува цинявнналгу хIарачат бан аьркинссар жула маз «ливтIу мазурдивун» къабагьан. На хъинну ххари хьура лакку мазрал диктант дазул кьатIув ялапар хъанахъисса лакралгу чирчушиву кIул хьувкун. Мунин бувну, чIалай бур лакку мазрахсса ччаву жула халкьуннаву ядурну душиву, лакку маз бусан ва му лахьхьин гъира бушиву. Ниттил накIлищал жула оьттувун ва ттурчIавун бувхсса маз хъама битан бучIирив туну?

Вай гьарцагу кIицI лавгсса масаларду гьанулун лавсун, сакин дурсса лакку мазрал диктантралгу батIин бувну бия чIявусса лак, лакку маз ххирами. ЛяличIийсса пахру багьуна ттун, диктант дуккин ккаккан бувну тIий Шушиннал школалул лакку мазрал учительница Багъирчаева Умамат. Цувгу лайкь хьусса Мариян Ильясовал цIанийсса премиялун, ларайсса даражалул кIулшиву дуллай тIий дуклаки оьрчIан лакку мазрал дарсирдай.

Диктант къуртал хьуну махъ, «Дараччи» фондрал вакилтал хьуна бавкьуна ЦIуссалаккуй лакку мазрал дарсру дишайсса учительтуращал. Барчаллагь учин ччай бура ттула чулуха фондрал вакилтурахь лакку маз ябуван ва му лакрал дянив машгьур буван хIарачат буллалисса.

Ялу-ялун лаку маз ххирамий ва му ябавриха аякьа дуллалими чIяву хьуншиврий мукIруну бура»,- укунсса ихтилат бувну жущал Светлана Кудаевал. Жугу, жула чулуха, барчаллагьрай буру, цинявппагу школардал кказитрал подписка чIумуй дувайнутIи. Подписка давривугу Светлана Рамазановнал хIарачат бувшиву кIулну буру.