Цила хъирив хъинсса ц1а кьариртун дур ванил
Винма къаччимур цаманан мабував тIисса мяъналий оьрму бувтуну бур Чапаевкаллал шяраву ялапар хъанай бивкIсса Кьурбанова Шура Сапижуллагьлул душнил. Мунихлуну Шурал цIа хъинчулий дакъа кIицI дансса акъар шяраву инсан. I944-ку шинал Бярнихиял шярава цIусса миналийн бизан бувкун, Шуран диркIун дур арулла шин. ЧIивинияцIа байбивхьуну захIматшивуртту лахълай лавгун бур Шурал оьрму. Цилва маэшат буллай ва хъамитайпалул чIярусса давурттив канилух дувккун дур шяраваллил колхозрай зий. Колхозрайсса даврий зузаву дакъассагу, хъамитайпалул къатлуву зунсса давугу чансса къадикIай. Та чIумал оьрчIру ябуван, ччаннай бацIан буван бакъасса, бугьан багьайва ризкьи – кьинигу, зун багьайва къурувгу.
Шурангу цила лас Муртузалищал ччаннай бацIан бан багьлай бия мяйва оьрчI. Сантирай дулларчан, даву кIутIа шайссар тIун бикIай. Шурагу бикIайва гьарзатраву сант кIулсса, цила ялгъузшиву кIулну къуццу тIун кIулсса,гьарзадрал хъирив лавну, цийвасса бурж биттур бан к1улсса инсан. Шураву бия хъамитайпалун кIулну бикIан лайкьсса дуруххаврил, кIунурдай щащаврил пиша.
АцIунния лирчусса шинну дурну дур Шурал районналул комбинатрай янна дуруххуну зий. Цилла дакIнива нанисса ттюнгъашиврул Шурал гъели бувайва цилва оьрчIру, лагмаялттумий, мачча гъанмий. Ва бикIайва гьарцаннан диял хьунсса ччаву дакIнивату нанисса инсан, мунихлуну Шурал оьрчIаву дур дазу – зума дакъасса хъунанахсса хIурмат, мяърипат ва къирият.
Кьинирду лахълай аьдатсса хъамитайпалул ялун дирну дур оьккисса кьини, жагьилсса оьрмулий апат хьуну ялату лавгун ур ххирасса лас. Му чIумал щаллу бувну, къатлул бувну бивкIун бур бувагу кIива оьрчI. Ца кьурчIишиврул ялун дирну дур цамургу- лас ивкIуну хъунма хIал къалавгун, бивкIуну бур хъунма хъунмур душгу, мунил чIивисса душгу багьну бур ниттил ниттихун.
Шаймур буллай, цащава шайсса кумаг ниттин буллай, хъуниминнал мюрщинан кумаг буллай хъуни хьуну бур Шурал оьрчIру. Мунил ихтилатрах вичIи дирхьукун, ванил иминсса симан ххал хьувкун, вич1и дирхьунан дакIнин багьанссия, ванил щихьч1ав лахъсса ссих1гу дуккайривав куну. Му хъунмасса дакIнил бутIа, хъиншиву, паракьатшиву, инсаннаха хIурмат – кьимат баву духьунссия ванил оьрчIан дуллусса тарбиялувугу. Ниттил цилва ялув бувсса захIмат кIулсса Шурал оьрч1ан, ляличIину ниттич1ансса хIурмат лавайну бия: сагъну дуний хъатлия хъатлий дихьлай нину ядуллай бикIайва. Цилва душаращал куннасса дикIайва Шурал арснал хъаннищалсса арардугу.
Ниттил цавура дирхьусса тарбия щяв къадихьлай, цаннач1а дакъамур гаманал щаллу дуллай, цаннал чIарав ца бацIлай оьрму бутлай бур хIакьинусса кьинигу Шурал оьрчIру ва оьрчIал оьрчIру.
Учин ччай бур,вайннал оьрмулуву ххаришивуртту ч1яру даннав,дак1нийсса мурадру барт лаганнав, укунсса инсантал жяматраву чан къабаннав!
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
